زتونة الـHistology الترم الأول

من طرف **AmrZeid** 05/08/16, 02:51 pm

هقتبس المقدمة من موضوع زتونة الفسيولوجي ف استحملني

AmrZeid كتب:
نظام المواد عندنا في أولى وتانية مختلف عن الجامعات التانية شوية،
بمعنى إن المواد في الجامعات التانية هي : أناتومي، فسيولوجي، هستولوجي، بايوكميستري
لكن عندنا بيجمع الفصول المتعلقة ببعض من الأناتومي والفسيولوجي والهستولوجي (أو الفسيولوجي والهستولوجي بس) ويحطهم في مادة واحدة.
يعني مثلًا: عملية التنفس (فسيولوجي) + شكل الرئتين ومكانهم وتغذيتهم (أناتومي) + التركيب الدقيق للرئتين (هستولوجي) = دول يجمعهم في مادة واحدة مع بعض ويسميها مادة التنفس ( بقول مثلًا يا جماعة )

الفسيولوجي عندنا في سنة أولى -الترم الأول- جزء من مادة اسمها
Cell Biology أو بيولوجيا الخلية

كل الفكرة في الموضوع :
إن الفسيولوجي ده علم الوظائف ، و الهستولوجي ده علم التركيب الدقيق
وانت ف سنة أولى هتدرس الخلية ، مكوناتها ووظائفها
مكونات الخلية : هتتعرف عليها من خلال علم الهستولوجي
ووظائف الحاجات اللي جوا الخلية : هتتعرف عليها من خلال علم الفسيولوجي

بس كده .. بسيطة أهيه

Histology
أو Histo زي ما طلاب طب بيدلعوه

ده علم دراسة الخلايا والأنسجة ، تقدر تعتبره النسخة العميقة من علم التشريح
يعني زي ما انت فهمت ، الأناتومي بيدرس تركيب الجسم من عضلات وعظام وأعصاب ..إلخ
الهستولوجي بقى بيمسك العضلة الواحدة ويدرس تركيبها من الخلايا والأنسجة و كده

وطالما العلم ده بيتعامل مع الخلايا والأنسجة ، و الحاجات دي صعب تشوفها بعينك المجردة ،
علشان كده هيبقى تعاملك مع المايكروسكوب ..

ف الترم الأول دراستك بتبقى عامّة ، أول محاضرة بتبقى عن كيفية استخدام المايكروسكوب ،
وبعد كده إزاي بيتم تحضير الشريحة ، وبعدين الخلية بشكل عام The Cell ، وبعد كده بتدخل ع الأنسجة
وتاخد النسيج الطلائي Epithelial tissue و آخر شبتر النسيج الضام Connective tissue
المادة بسيطة وسهلة الترم الأول

زتونة الـHistology الترم الأول Fgfdg

المحاضرات :

نظامك في المحاضرة بيختلف حسب الدكتور اللي بيشرح
لكن فيه حاجات أساسية المفروض تعرفها

-          لو شرحتلك الدكتورة إيمان – رئيسة القسم – لازم ترسم وراها الرسومات ، لإنها بتطالب بيها ف
امتحان النظري ، ده غير إن رسوماتها سهلة جدًا ، وهتساعدك في الفهم .

-          لو مشرحتش الدكتورة إيمان بقى ، وشرحلك دكتور أحمد أو دكتور ياسر ، ف دول مش بيرسموا
ع السبورة ، لكن الدكتورة رئيسة القسم بتطالب بالرسومات برضو ف الامتحان !!
علشان كده بتضطر تاخد الرسومات من حد أكبر منك ، واحنا هنحاول نوفرهالك بإذن الله في موضوع مستقل .

-          بالنسبة لدكتورة إيمان ، ممكن تستخدم الداتا اللي هي بتشرح منها Power Point بديل عن
كتاب القسم في المذاكرة .. أو تذاكر من كتاب القسم براحتك

-          بالنسبة لباقي الدكاترة ، في امتحانات أعمال السنة كل دكتور بيحط الأسئلة بتاعت الشبتر اللي هو شرحه ،
علشان كده ممكن تذاكر من الورق بتاعهم لامتحانات أعمال السنة ، لكن مش امتحان التحريري !!

وتقدر تسجل للدكتور اللي بيشرح ، وتسمع المحاضرة تاني في البيت ، بتعمل كده ف كل المواد ،
لكن فيه دكاترة مش بيرضوا حد يسجلهم زي دكتورة درية ( دكتورة الأناتومي )

المصادر الخارجية :
هستولوجي الترم الأول بسيط جدًا ، مش محتاج مصادر خارجية للمذاكرة بتكتفي بتسجيلات الدكتور
اللي بيدي المحاضرة .. لكن لو حابب تسمع فيديوهات
ف شوف فيديوهات د/ جيهان ( القصر العيني ) ، شرحها ظريف و بترسم أثناء الشرح .

فيديوهات النظري Histology الترم الأول

العملي :

بعد ما تاخد ف المحاضرة النسيج وبيتكون من إيه و الخلايا وشكلها إزاي .. إلخ ، بتروح السكشن علشان
تشوف الحاجات اللي اتشرحتلك في المحاضرة ، تحت المايكروسكوب ..

ف السكشن المعيد بيشرحلك الشريحة دي وبتتكون من إيه ، وإزاي تقدر تميزها عن باقي الشرايح تحت المايكروسكوب
وكمان بيرسم الشريحة على السبورة ، و انت بترسمها وراه – أو بتصورها وترسمها بعدين – في كراسة العملي
اللي بتشتريها مع كتاب القسم ، والكراسة دي بيبقى عليها درجات .

زتونة الـHistology الترم الأول Fgfdg

الامتحانات :

أعمال السنة :
غالبًا بيبقوا امتحانين بس ، امتحان بعد أول شبترين ، وامتحان تاني بعد ما تخلصوا ، و طبعًا ملهمش معاد محدد ..
المعاد بيتحدد بالاتفاق بينكم وبين القسم .
والامتحانات بتبقى MCQ يعني اختيار من متعدد .

النظري :
بتمتحن نظري هستولوجي مع نظري فسيولوجي .. بتاخد ورقتين سؤال ، وكراستين إجابة ف نفس الوقت
- الامتحان بيبقى كله أو معظمه Short Notes يعني أسئلة مقالية ، وبيبقى مطلوب منك مع الإجابة
إنك ترسم – الرسومات اللي الدكتورة بترسمها ف المحاضرة ، غير رسومات العملي –
علشان تاخد الدرجة كاملة .

العملي :
عبارة عن امتحانين :
1- امتحان الرسم : الدكتور بيديلك اسم كام شريحة – 4 شرايح غالبًا – وانت بترسم الرسومات بتاعتها ،
وهي الرسومات اللي المعيد بيرسمها قدامك ف السكشن وانت بترسمها ف كراسة العملي ..
مع العلم إن كراسة العملي بتتسلم قبل الامتحان.
تقدر بعد كل سكشن ، أو ف الآخر ف فترة المراجعة تطلب من المعيد إنه يراجع رسوماتك علشان تتأكد من إنها صح ،
لإن كشكول العملي عليه درجات زي ما قلنا .

2- امتحان الشرايح : ده امتحان المايكروسكوبات ، بتعدي على 10 مايكروسكوبات ، ومعاك ورقة ،
بتبص ف كل مايكروسكوب لمدة دقيقة أو حسب ما الدكتورة تقول ، و تعرف إيه الشريحة دي و فين مكانها
ف جسم الإنسان ، وإيه الصبغة اللي هي اتصبغت بيها – كل ده هيتشرح ف السكاشن –

إحنا هنوفرلك بإذن الله صور للشرايح دي متصورة بالموبايل من المايكروسكوب ، ومكتوب عليها البيانات المطلوبة ،
لكن أحيانًا الشرايح بتتغير ف ممكن تبقى الشريحة اللي هتشوفها تحت المايكروسكوب مش نفس اللي ف الصورة ..
ف علشان كده كل دفعة بتصور الشرايح بتاعتهم .

عملي : صور الشرايح و الرسومات Histology الترم الأول 2015

الشفوي :
زي ما قلنا ف الأناتومي .. الدكتور هيسألك ع السريع ، و هيديك درجة كويسة .

زتونة الـHistology الترم الأول Fgfdg

توزيعة الدرجات
الهستولوجي الترم الأول عليه 90 درجة ، متقسمة ع الامتحانات كالتالي :
أعمال السنة : 27 درجة
العملي : 22 درجة
النظري : 32 درجة
الشفوي : 9 درجات

زتونة الـHistology الترم الأول 657657