زتونة الـBiochemistry الترم الأول

من طرف **Admin** 05/09/15, 05:58 am

Biochemistry

البايو ، أو الكيمياء الحيوية .. دي كيميا جسم الإنسان ، بتعرّفك العمليات الكيميائية اللي بتحصل ف جسمك ،

والمواد اللي بتشارك ووظيفتها والمواد اللي بتنتج ، والتركيب الكيميائي للمواد دي

المادة دي أكتر مادة الطلاب بيجيبوا فيها تقدير ؛ لإن قسم البايو عندنا جمييل خااالص Very Happy

الدكاترة بيحددوا مواضيع معينة بياجي منها الامتحان ، والأسئلة بالنص من الامتحانات السابقة ،

وامتحانات أعمال السنة تافهة ، غير إنها مكررة .. وامتحان العملي ف جيبك ..

غير إن الدكاترة مش بيدققوا أوي ف التصحيح وممكن تحسب لنفسك جيد ، تلاقي نفسك جيد جدًا ومش بعيد امتياز !
ربنا يباركلنا فيهم

زتونة الـBiochemistry الترم الأول Fgfdg

الشباتر اللي هتدرسها الترم الأول :

1-     Carbohydrates : حوالي 70 ورقة
2-     Lipids : حوالي 70 ورقة برضو
3-     DNA : تقريبًا 100 ورقة
4-     Free Radicals : تقريبًا 10 ورقات

متتخضش ، تقدر تلخّص الكلام ده ف ورق قليل ،
غير إن القسم بارك الله فيه بيقول على حاجات إنها مش مهمة أثناء المحاضرة ، ف هتلاقي المادة بقت صغيرة

لكن المشكلة إن الشرح بيكون سريع ، ف انت محتاج تذاكر أول بأول علشان متتزنقش ،

خصوصًا إنك هتاخد فترة على ما تتعود ع المادة و على أسماء المركبات الكتيرة .
زتونة الـBiochemistry الترم الأول Fgfdg

المذاكرة :
بتحضر المحاضرة – خصوصًا محاضرات د / محمد حسني – وتحاول تركز في الشرح ،

وتسجل المحاضرة علشان تسمعها تاني و ميفوتش منك حاجة من الشرح أو من التحديدات ..

-          بالنسبة لمصدر المذاكرة : ف كتاب القسم كافي جدًا ، المعلومة فيه مبسطة ومشروحة بطريقة كويسة..
لكن إذا كنت حابب تستزيد ، أو الكتاب أحيانًا بيختصر في حاجات ف انت عاوز تطلع أكتر ،
ف قدامك كتاب د / عرابي ، شرحه محترم وبيفهمك بسهولة .

-          التسجيلات بقى : ف البايو هتقابلك مشكلة إن منهج الكلية بتاعتنا مختصر جدًا مقارنة بالقصر العيني أو غيره ،
ف لو قررت تسمع تسجيلاتهم ، هتلاقي إن الحاجات اللي عندنا مشروحة ف نص صفحة ،

ممكن الدكتور عندهم يشرحها ف ساعة كاملة !
ف انت بتكتفي بتسجيلات الدكتور اللي بيشرح عندنا .
لكن عمومًا لو حابب تجرب ، ف تسجيلات د/ عباس جميلة جدًا ، و بيبسط المعلومة جدًا .

-          ممكن تتفرج على فيديوهات د/ رشيد ، حلوة برضو .

فيديوهات وتسجيلات الـ Biochemistry الترم الأول

العملي :
ف عملي البايو بتشتغل ف المعمل ، بتبقى لابس البالطو كده شطور ومعاك أدواتك وتعمل التجارب ..
المعيد أو المعيدة بيشرحلكم الخطوات بتاعت التجربة والناتج و بيعمله قدامكم ،

وبعد كده بتعملوه بأنفسكم ، وبتسألوه إذا كان الناتج بتاعكم صحيح ولا لأ .
واطمئن .. هتعمل التجارب لغاية ما تحفظها ، خصوصًا ف سكاشن المراجعة

وف الآخر كده المعيد بيقولكم على مذكرة فيها تفاصيل التجارب ، بتجيبوها وتنقلوها في كراسات العملي ،
وبتسلم كراسة العملي وانت داخل امتحان العملي

الامتحانات :

أعمال السنة :
امتحانين أو تلاتة ف الترم ، غالبًا MCQ وأحيانًا صح وغلط
الامتحانات بتاجي سهلة – بإذن الله – ومكررة من السنين اللي فاتت ،
وهيبقى فيه مذكرة امتحانات قديمة إن شاء الله .

العملي :
بيبقى قدامك محلولين مجهولين ، مطلوب منك تتعرف عليهم ، وتكتب تفاصيل التجارب اللي وصّلتك للإجابة ..
طبعًا بتعمل التجارب اللي عملتها ف السكاشن لغاية لما زهقت منها ،

و المذكرة اللي نقلت منها كراسة العملي ، بتاخدها معاك الامتحان

وتنقل منها تفاصيل التجارب المطلوبة ف ورقة الإجابة

النظري :
امتحان Short Notes ، أغلب أسئلة الامتحان بتاجي من الامتحانات السابقة بالنص ،

يعني بتدخل الامتحان وانت ف جيبك تلات أرباعه ..
غير إن القسم بيحدد حاجات الامتحان مش بيخرج عنها إن شاء الله .

الشفوي :
زي باقي الأقسام .
زتونة الـBiochemistry الترم الأول Fgfdg

توزيعة الدرجات :
البايوكمستري الترم الأول عليه 90 درجة ، موزعة كالتالي :

أعمال السنة : 22 درجة
العملي : 27 درجة
النظري : 32 درجة
الشفوي : 9 درجات

زتونة الـBiochemistry الترم الأول 657657

زتونة الـBiochemistry الترم الأول 657657