منتدى إيد على إيد - طب قنا
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

زتونة الـAnatomy الترم الأول

استعرض الموضوع التالي استعرض الموضوع السابق اذهب الى الأسفل

شامل زتونة الـAnatomy الترم الأول

مُساهمة من طرف Admin 05/09/15, 02:25 am

زتونة الـAnatomy الترم الأول 685685



Anatomy
الأناتومي أو علم التشريح ، هتدرس فيه مكونات الجسم كله بالتفصيل على مدار سنتين
عضم و عضلات وأعصاب وشرايين وأوردة .. إلخ
مادة دسمة
Laughing
و علشان كده هتبقى متقسمة أجزاء ،
في الترم الأول هتدرس تشريح الطرف العلوي ( الدراعين يعني ) ، و الطرف السفلي ( الرجلين )
وقبلهم هتاخد كتاب صغير كده كمقدمة لعلم التشريح بيعلمك المصطلحات والأساسيات
وف الترم التاني هتدرس تشريح الرأس والرقبة و الصدر



زتونة الـAnatomy الترم الأول Fgfdg 


1. Introduction
الإنترودكشن أو المقدمة زي ما قلنا دي هتبقى بدايتك مع علم التشريح ،
الكتاب هيفهمك مثلًا أسماء الحركات اللي الجسم بيعملها ، وبيصنف العضم ، والعضلات ، والمفاصل وكده ..

مبدئيًا هتلاقي مصطلحات لاتينية كتير ، ف هتواجه مشكلة حتى لو الإنجلش بتاعك كويس
بالإضافة لو كنت تعليم حكومي زي حالاتنا ، هتفرق معاك قوي إنك كنت بتدرس كل حاجة بالعربي ،
ودلوقتي مش هتلاقي حاجة بالعربي
Sad
و ممكن ده يعقدك من الطب من أول كام شهر

لكن بنطمنك .. بعد ما تتعود هتلاقي الموضوع بقي بسيط وسهل ، و متخافش .. كلنا اتعودنا ،
حتى الناس اللي كان مستواها ف الإنجلش ضعيف قبل الكلية
   Surprised



بس علشان نسرّع من عملية تعودك على المصطلحات الجديدة ، و الإنجلش ، بننصحك :
1- تجيب قاموس للمصطلحات الطبية اسمه ( قاموس دكتور فوزي جاب الله ) ، هتستخدمه في ترجمة
المصطلحات الجديدة والكلمات اللي مش عارفها لغاية ما تتعود بقى
و ده هنحاول نوفرلك منه نسخة
PDF علشان تشوف هينفع معاك ولا لأ قبل ما تجيبه



2-    يا إما تستخدم قواميس طبية أو شاملة على الكمبيوتر أو الموبايل ، زي Babylon كده
وده برضو هنحاول نشرحه بالتفصيل ف موضوع مستقل


لو حابب تسمع فيديوهات ف الإنترودكشن يبقى قدامك
فيديوهات د/ أحمد كمال ، و د/ مجدي سيد
الأفضل مجدي سيد لإنه بيعمل الأشكال قدامك ف بيخليك تتخيل كل حاجة ، لكن مش شارح كل حاجة للأسف
و د/ أحمد كمال بيشرح على صور ثابتة لكن شرحه كويس برضو
و دول هتلاقيهم في الموضوع ده

أهم فيديوهات النظري Anatomy الترم الأول







لكن عمومًا متشغلش بالك قوي بالإنتروكشن ، لإنها مش عليها درجات كتير ، غير إنك ممكن تقابلك حاجات
 متفهماش ف البداية ، لكن بعد ما تدخل ف المنهج هتلاقي نفسك فهمتها لوحدك .


زتونة الـAnatomy الترم الأول Fgfdg
 
2. Upper Limb

الأبر ، أو الطرف العلوي ، هتدرس فيه الدراعين و الكتف بكل اللي فيهم ، من عظام ( Bones  ) ،
و عضلات ( Muscles ) ، و أعصاب ( Nerves ) ، وشرايين ( Arteries ) ،
وأوردة (
Veins ) وغيره Smile



بالنسبة للمذاكرة فيه أكتر من طريقة :

1-    هتذاكر من كتاب القسم – اللي هتشتريه من الكلية – بالإضافة لإنك هيبقى معاك القاموس سواء
 الورقي أو اللي ع اللاب أو الموبايل و تترجم الكلمات الصعبة في البداية ، دي الطريقة التقليدية

ومشكلة الطريقة دي : إنك صعب تفهم بيها خصوصًا لو مكنتش بتفهم من المحاضرات في الكلية
– عادي جدًا كتير مننا مش بيفهم قوي من المحاضرات – ف بتضطر تترجم الكلمات علشان
تحفظها وخلاص ، وانت و نصيبك فهمت أو مفهمتش .



2-    هتسمع فيديوهات ، ( د/ أحمد كمال ، أو د/ مجدي سيد ، أو د/ مدحت ) وبعد ما يخلص
 الفيديو تروح على كتاب القسم وتذاكر منه ، أو تبقى ماسك كتاب القسم أثناء ما الفيديو شغال
 وكل ما تخلص جزئية تقراها من كتاب القسم وتترجم الكلمات الصعبة من خلال
الشرح اللي ف الفيديو نفسه ..
وعلشان المعلومات لسه سخنة في ذاكرتك بتلاقي نفسك لما بتقرا ف الكتاب فاهم حاجات كتير
Smile

أهم فيديوهات النظري Anatomy الترم الأول






أما مشكلة الطريقة دي
: إن الدكتور اللي بيشرح ف الفيديو من جامعة تانية ، يعني بيبقى فيه
شوية اختلافات بين المنهج بتاعنا وبتاعهم ، فمثلًا ممكن تلاقيه شارح جزئية مش موجودة عندنا ،
أو فيه جزئية عندنا هو مش شارحها – وساعتها بتستعين بالطريقة الأولى – أو بيبقى شارح بترتيب
 غير ترتيب الكتاب بتاعنا .. عمومًا الطريقة دي ما تزال أفضل من الأولى



3-    هتذاكر من كتاب خارجي غير كتاب القسم ، سامح دوس مثلًا ، بيبقى منظم أكتر
من كتاب القسم بتاعنا و الفهم منه أسهل وكذلك الحفظ ، وبتسمع معاه فيديوهات ،
أو بتستخدم القاموس .

مشكلة الطريقة دي : إن فيه امتحانات دورية كده ف الكلية كل فترة اسمها امتحانات " أعمال السنة "
 دي بتبقى غالبًا
MCQ يعني اختيار من مُتعدد ، الامتحانات دي أحيانًا بتبقى من بين السطور ،
من كتاب القسم مش من الكتب الخارجية ، ف لو اعتمدت على كتاب خارجي و مفتحتش كتاب القسم
 ممكن تلاقي تلاقي أسئلة كتير متعرفهاش .

ف ممكن بعد ما تفهم الجزئية من الفيديوهات و تذاكرها ف الكتاب الخارجي ، ترجع لكتاب القسم
وتضيف منه الحاجات اللي مش موجودة ف الكتاب الخارجي .

طبعًا انت بتجرب الطرق دي وتشوف أي طريقة هي اللي مريحاك وبتكمل معاها ،
ممكن طريقة نفعت مع غيرك متنفعش معاك ، أو العكس .. ف خليك حر و اختار اللي يناسبك


زتونة الـAnatomy الترم الأول Fgfdg

3. Lower Limb

اللور بقى أو الطرف السفلي ، هتدرس فيه نفس المكونات اللي كانت ف الأبر – الطرف العلوي –
يعني
Bones , Muscles , Nerves .. etc



بالنسبة لطريقة المذاكرة زي ما حكينا في الأبر ، مذاكرة الأناتومي عمومًا كده .


زتونة الـAnatomy الترم الأول Fgfdg

نيجي بعد كده للامتحانات

عندك يا دكتور 4 أنواع من الامتحانات : أعمال سنة .. نظري .. شفوي .. عملي
خلينا بقى نتكلم عنهم بالتفصيل

أعمال السنة
فاكر امتحانات الشهر بتاعت إعدادي وثانوي؟ دي تقريبًا زيها ، لكن الفرق إنها مش ضروري تبقى كل شهر Very Happy
الامتحانات دي غالبًا بتبقى عبارة عن MCQ واحفظ الاختصارة دي لإنها هتقابلك كتير ،
ودي معناها (
Multiple Choice Question ) أو الاختيار من متعدد ،
يعني بيسألك سؤال ويديك أربع اختيارات تختار الإجابة الصح فيهم ..
هي مش سهلة قوي زي ما انت فاكر ، لإنها غالبًا بتبقى من بين السطور ف محتاجة مذاكرة جامدة ،

و بيبقى مع الـMCQ أحيانًا كام سؤال Complete  يعني أكمل ، و أحيانًا صورة وعليها أسهُم ،
و عليك تعرف كل سهم بيدل على إيه .


أحيانًا بقى أعمال السنة مش بتبقى MCQ ، بتبقى حاجة اسمها Short Notes يعني أسئلة مقالية ،
 بيسألك سؤال ويقولك هات اللي تعرفه عنه . لكن غالبًا في الأناتومي أعمال السنة على طول
MCQ

 

النظري أو التحريري
ده يا حضرة الدكتور الامتحان العادي اللي بتمتحنه على الورق آخر كل ترم ،
الامتحان ده بقى بيبقى Short Notes ، وأحيانًا ممكن الدكتور يضيف فيه كام نقطة MCQ
أغلب الأسئلة بتاعت النظري بتبقى من الامتحانات السابقة ، خصوصًا ف سنة أولى ،
ده غير إن الدكتورة درية – رئيسة القسم – بتقول ف آخر الترم على أهم المواضيع
اللي هتركز عليها ف الامتحان .




الشفوي
ده امتحان مش على ورق ، بتدخل للدكتور يسألك اسمك ورقم جلوسك ، و بعد كده يسألك سؤالين
 ف المنهج وتجاوب عليهم شفوي من غير كتابة ، وبعدين يقولك اتفضل ويديك الدرجة

استنى بس متتوترش كده ، امتحان الشفوي ف سنة أولى بيبقى عليه درجات قليلة ،
بالإضافة لإن الدكاترة فاهمين إنك أول مرة تمتحن شفوي و كده ف بيدوك درجة كويسة
 حتى لو مجاوبتش !




العملي
و ده بقى الامتحان اللي بتمتحنه على العينات ، بيجيبلك عينة – دراع مثلًا – ويربطلك عضلة مثلًا
 ويسألك كام سؤال عليها .. اسمها إيه الـ
Muscle دي ، بتبدأ من فين ( Origin )
وبتنتهي فين (
Insertion ) ؟ إلخ

العينات اللي ف امتحان العملي نوعين :
1-    العضم Bones: بيجبلك عضمة معينة ويسألك عن شوية تفاصيل عليها .
2-     اللحم Fleshy : ودي اللي بيجيبلك فيها دراع أو رجل ويسألك على تفاصيل جواها .

عمومًا انت بتحضر حاجة تاني غير المحاضرات اسمها السكاشن Sections – بيبقى عليها غياب وحضور –
ودي اللي بيتشرح فيها العملي ، وبتشوف الجثة أو العينات والمعيد بيشرحلك عليهم و كده .

مذاكرة العملي :
-         طبعًا بتحضر السكاشن وتركز مع المعيد ، ولو مش فاهم جزئية بتطلب منه إنه يعيدها .
-          كمان بتسمع فيديوهات شرح للعملي زي فيديوهات د / الفقي ، أو غيره .

فيديوهات عملي الـAnatomy الترم الأول






-         وبتروح المشرحة – المكان اللي بتاخد فيه السكاشن – في أي وقت تكون فاضية فيه
 وتطلب من العمال إنهم يطلعولك العضم ف تذاكر عليه ف المشرحة

وفيه ناس بتشتري العضم ده من برا وبيبقى موجود معاهم ف البيت علشان يذاكروا عليه يعني
-         و بتشتري أطلس مصور – أطلس الفقي ، أو فوزي جاب الله– بيبقى فيه صور العضم وعليه البيانات بتاعته ،
و كذلك الـ
Muscles أو الـ Fleshy ، وبتستخدمه في المذاكرة خصوصًا على العضم ف المشرحة .



فيه ناس بتحب تستخدم الأطلس ده أثناء المذاكرة للنظري ، بحيث إنهم يربطوا بين العملي والنظري
 ويبقوا فاهمين تمام .. دي طريقة حلوة برضو ومفيدة قوي
Smile


صحيح .. غالبًا ترتيب الامتحانات بيبقى كده :
أعمال سنة ،
عملي ، نظري ، شفوي


زتونة الـAnatomy الترم الأول Fgfdg

توزيعة الدرجات
الأناتومي الترم الأول عليه 150 درجة ، بتتوزع ع الامتحانات كالتالي :
أعمال سنة : 45 درجة

عملي : 37 درجة
نظري : 53 درجة
شفوي : 15 درجة





زتونة الـAnatomy الترم الأول 657657

Admin
Admin
Admin

الجنس : ذكر
عدد المساهمات : 43
تاريخ التسجيل : 27/08/2015
الموقع : http://tebqena.egyptfree.net

http://tebqena.egyptfree.net

الرجوع الى أعلى الصفحة اذهب الى الأسفل

استعرض الموضوع التالي استعرض الموضوع السابق الرجوع الى أعلى الصفحة

- مواضيع مماثلة

صلاحيات هذا المنتدى:
لاتستطيع الرد على المواضيع في هذا المنتدى